Pinatakyas ti Department of the Interior and Local Government (DILG) iti puesto ti Direktor ti Philippine National Police Academy (PNPA) kasta met dagiti walo pay a dadduma nga opisyales gapo paylaeng iti insidente ti hazing iti uneg ti akademya.
Kinuna ni Interior Secretary Jonvic Remulla a maipasidong ti administrative relief da PNPA director Police Major General Andre Dizon ken ti kakadwa na bayat a maisaysayangkat ti imbestigasyon.
Inaprobaran met ni PNP chief Police General Jose Melencio Nartatez Jr. ti rekomendasyon iti Criminal Investigation and Detection Group (CIDG) a mangisayangkat ti imbestigasyon para ti panangdakamat ti maidatag a kriminal ken administratibo a kaso.
Nasurok 20 a fourth-class cadets ti nadundunor iti insidente a mapapati a napasamak idi Abril 3; nakagun-od dagitoy ti pannakasinit a nagtaud ti napaglaok a drain cleaner ken muriatic acid.
Agparparang a nangrugi ti hazing iti issue idiay uneg nga adda pakainaigan na ti maysa a cadet a panggep nga agikkaten, nu sadinno ket napabasol ken nadusa iti nababbaba kenkuana a kadete.
