BR LA UNION – Inwaragawag ni Department of Interior and Local Governement (DILG) Secretary Jonvic Remulla nga adda dagiti indikasyon a posible a ma-extend iti termino ni Philippine National Police (PNP) Chief PGen Rommel Francisco Marbil agingga June.
Segun kenni Remulla, posible nga agbalin nga ineffective nu masukatan a dagus ni Marbil nangruna ket kalkalpas klaeng ti panagbalasa iti sumagmamano a nangangato nga opisyal ti PNP ken nangrugi metten ti panagsagana para iti umadani a National and Local Elections.
Ngem inlawlawag ti sekretaryo, nga indikasyon laeng daytoy, ket ni President Ferdinand ‘Bongbong’ Marcos latta ti mangi-anunsyo ken agdesisyon nu masukatan ti PNP Chief.
Ni PNP Chief Marbil ket namnamaen nga agretiro inton Pebrero wenno mandatory retirement age a 56 years old.
Sumagmamano kadagiti posible a sumukat kenni Marbil kas PNP Chief ket isuda PNP deputy chief for administration Lt Gen. Jose Melencio Nartatez; acting PNP deputy chief for operations Lt. Gen Robert Rodriguez ken PNP Chief directorial staff Lt. Gen. Edgar Alan Okubo.
