Impaganetget ni Senador Ping Lacson a posible a “bagman” wenno “legman” dagiti dakkel a kontratista dagiti District Engineers ti Department of Public Works and Highways, kasaruno iti gandat a panangsuksok ni Batangas 1st District Engineer Abelardo Calalo kenni Batangas 1st District Representative Leandro Leviste seknan dagiti naanomalyaan nga infrasture project ti probinsya.
Segun iti senador, saan a normal nga iti mismo a district engineer iti mangidiaya ti pasuksok ken saan a dagiti kontratista. Isuta rumbeng laeng a maaddaan ti naun-uneg nga imbestigasyon ti Philippine National Police Criminal Investigation and Detection Group ken iti National Bureau of Investigation tapno maamwan iti dagiti adda ti likudan daytoy.
Imbalad na pay a kasapulan ti “surgical solution” iti sistematiko a korapsyon iti ahensya ken saan laeng nga agpatingga iti simple a panagsukat wenno panangdutok dagiti opisyal.#
