Imbatad ni Justice Secretary Jesus Crispin Remulla a tumibtibkeren dagit ebidensya ken ‘case buildup’ seknan ti kaso dagiti “missing sabungeros” kasaruno ti panagtitinnulong dagiti nagduduma nga ahensya ti gobierno.
Paset paylaeng daitoy ti isaysayangat da a ‘search retrieval operations’ idiay Taal lake kabinnulig ti Philippine Coast Guard ken Philippine National Police.
Nupay kasta ket aminado met ti sekretaryo a saan a nalaka ti operasyon gapo iti “low visibility” nga estado ti Taal Lake, rason nu apay a marigatan a mangsukimat iti technical diving team.
Kabayatanna, nakikoordinar metten ti Department of Justice idiay Japan para ti kiddaw a panangusar ti kabaroan a teknolohiya a mangpalaka ti panagbiruk kadagiti sako wenno bangkay.
Iti agdama ket lima a sako ti balligi a narekobren ti diving team ti Philippine Coast Guard kadagiti paset ti Taal lake nga intudo iti whistleblower a ni Julie Patidongan.
Maipasidong dagiti nilaon dagitoy iti forensic investigation ken tapno maamoan apaman a tao dagiti tulang a narekobre ket maisayangkat met iti DNA sample matching na dagiti kakabagian dagiti biktima.
