BR LA UNION – Dismayado ni Department of Public Works and Highways (DPWH) Secretary Vince Dizon dagiti nakita na a saan pay a nalpas a proyekto idiay Bicol Region, kabilang dagiti naitalek kadagiti kontrobersyal a kontratista.
Naipasabat kenni Dizon ti dua a dadakkel a poste ti Malabog Flyover, a nangrugi a maipatakder idi pay tawen 2021.
Naamwan a nailatangan ti P159 million budget ti nasao a proyekto, ngem 12% laeng iti 700-meter a flyover iti naaramid.
Naamwan a ti HI-TONE Construction and Development Corp., a kukua ni Christopher Co, ken ti Alpha and Omega General Contractor and Development Corporation a kukua dagiti Discayas ti nangiggem ti nasao a proyekto.
Ni Christopher Co ket kabsat ti sigud a kongresista nga ita ket pugante a ni Zaldy Co.
Segun kenni Dizon, agpada a kabilang ti dua a kumpanya kadagiti 15 a kontratista a maipagarop a nangkontrol ti aganay 20% a flood control projects iti intero a pagilian.
Inwaragawag pay ti DPWH chief a mai-rebid ti flyover project iti baro a kontratista ita a bulan ti Pebrero.
Ibilang pay a problema ni Dizon iti Bicol Regional Medical Center idiay Daraga, Albay a nangrugi ti konstruksiyon na idi 2023, ngem uppat pay laeng manipud iti 10 a palapag ti naipatungpal.
Umabot iti P3.5 billion ti budget iti nasao nga ospital, a segun kenni Dizon ket naitantan gapu iti design changes, ngem impaganetget ti opisyal a nabayag unay ti tawen a naitantan ti pannakaitrabaho ti ospital.
Gaputi dayta, immandar ni Dizon kadagiti kontratista ti ospital a pas-pasan nga ileppas agingga iti sumarunmo a tawen.
