Sinuspindir ti Philippine College of Physicians (PCP) ni Dr. Anthony “Tony” Leachon ti innem a bulan gapo iti napaneknekan a panaglabsing na ti Code of Ethics iti organisasyon.
Maibasar iti 26-a-pinanid a desisyon ti 13-member Board of Regents, naglabsing ni Leachon iti ethical standards gapo kadagiti waragawag na ti pada na a doktor, karamanen dagiti alegasyon ti korapsyon a mapapati nga awanan met ti umdas nga ebidensya.
Segun iti organisasyon, dagiti nasao a waragawag ket maibilang kas “unethical” ken maisupadi iti akem na a kas miembro.
Nupay kasta, imbasura met ti PCP dagiti dadduma a paset ti reklamo kontra kenni Dr. Leachon, karamanen iti mapapati a misrepresentation kas expert witness ken panangiwaras ti biddut nga impormasyon seknan ti kontrobersiya ti Dengvaxia.
Kamauddian ket dagiti laeng kaso nga adda pakainaigan na ti defamation ken panaglabsing ti ethical standards iti napaneknekan a nasken nga agsungbat ni Dr. Leachon.
Gapo kadaitoy a reklamo ket napaulogan isuna ti pakabuklan nga innem a bulan a suspensyon.
Iti maysa a social media post ket kinuna iti doktor a saan isuna nga umanamong iti desisyon ken agdaman iti panangadal dagiti abogado na para iti sumaruno nga addang.
