Nangitukon ti Department of Budget and Management (DBM) ti P997.71-M para ti panangpapigsa ti programa a “Doktor Para sa Bayan” iti sidong ti 2026 National Expenditure Program.
Manipud kadaitoy a gatad ket P909.99-M ti nakatukon para ti Medical Scholarship and Return Service (MSRS) Program ti Commission on Higher Education bayat a ti P87.71-M met ket para ti Pre-Service Scholarship Program (PSSP) ti Department of Health.
Segun kenni Budget Secretary Amenah Pangandaman, ti salun-at ken edukasyon dagiti agtutubo ti kapatgan a puonan ti masakbayan ti Pilipinas.
Kas maiyannurot ti Republic Act 11509 wenno ti Doctors for the People Act, panggep ti programa a manayunan dagiti doktor kadagiti pampubliko a nga ospital ken kadagiti lugar nga agkurkurang ti serbisyo medikal.
Maaramid daitoy babaen ti libre a panagadal ken tulong pinansyal kasukat ti serbisyo dagiti komunidad.
Babaen met ti Pre-Service Scholarship Program, suportaran ti gobierno dagiti 245 medical scholars, 122 medical technology scholars, ken 104 pharmacy scholars.
