BR LA UNION – Naan-anayen a na-revoke iti lisensiya ni Teodoro Merjan Silvallana, iti driver ti Solid North bus a nangdungpar iti tallo a behikulo idiay SCTEX idi Mayo uno.
Iti presscon nga impaayab ti Department of Transportation (DOTr), kinumpirma ti Land Transportation Office (LTO) a naan-anayen a naikkat ti karbengan nga agmaneho ni Silvallana gaputi nakaam-ames nga aksidente.
Impaganetget ti LTO a ti panagkedked ni Silvallana nga agpaisidong iti drug testing ket mailabsing iti RA 10586 wenno Anti-Drunk and Drugged Driving Act of 2013.
Nakailanad iti nasao a linteg nga amin a driver a karaman iti aksidente ket required nga agpaisidong iti drug test.
Kabayatanna, kinumpirma met ni Land Transportation Franchising and Regulatory Board (LTFRB) chairman Teofilo Guadiz, a dumalan iti road-worthiness check iti amin a 273 a bus unit ti Solid North Bus Transit Inc.
Naibilin pay a maipasidong iti drug testing ti amin a driver ti nasao a bus company, maiyannurot iti mandar ni DOTr Sec. Vince Dizon.
Maipalagip a 12 ti natay a pakaibilangan ti innem nga ubbing ken 27 dagiti nadundunor iti napasamak a karambola iti uppat a lugan idiay SCTEX idi huwebes, Mayo uno, kalpasan a nakaturog iti driver ti solid north bayat nga agman-maneho.
