BR LA UNION – Epektibo ita nga aldaw ti Lunes, Setyembre 28, iti panagngato ti singir ti plete kadagiti pampubliko a lugan.
Iti sidong ti aprubado a baro a fare hike ti Land Transportation, Franchising and Regulatory Board (LTFRB), iti P13 a minimum fare iti ordinaryo a dyip ket agbalinen a P14 para iti umuna nga uppat a kilometro. Ngem iti sumarsaruno a kilometro ket ngumato ti P2.
Kabayatanna, para met iti modern public utility jeepneys, agbalinen a P17 ti minimum a plete, ken kanayunan a P2.40 iti sumaruno a kilometro.
Ngumato pay ti singir iti plete kadagiti city wenno mini bus, agbalinen a P15 ti minimum a pamasahe para iti umuna a lima a kilometro, ken kanayunan a P2.49 iti tunggal sumaruno a kilometro.
Kadagiti air-conditioned bus, ngumato metten ti P18 iti minimum a pamasahe, ken P3 a kanayunan iti tunggal sumaruno a kilometro.
Iti provincial bus, ngumato ti P2 agingga P3 iti pamasahe ti tunggal sumaruno a kilometro, depende iti klase ti bus.
Bayat a manayunan ti P2.60 agingga P3 ti pamasahe iti UV Express iti tunggal sumaruno a kilometro.
Binilin ti Department of Transporation dagiti operator a mangipaskil ti baro a fare matrix ken itultuloy ti mangipaay ti discount kadagiti estudyante, senior citizen ken kadagiti persons with dissabilities.
