BR LA UNION – Mailunglungalong idiay House of Representatives ti maysa a gakat a mangingato ti diskwento a maipapaay para kadagiti senior citizen ditoy pagilian.
Daytoy ket ti House Bill No. 5187 wenno proposed Expanded Senior Citizens Act of 2010 nga ilunglungalong ni Senior Citizens Party-list Representative Rodolfo Ordanes, nga addaan tarigagay a nayunan iti benepisyo dagiti nataengan.
Ising-singasing ti linteg a manayunan ti lima a porsyento (5%) ti agdama a 20-percent senior citizen discount.
Dagiti seniors nga agtawen ti 70 agingga 79 ket maipaayan ti 25%; bayat a dagiti agtawen ti 80 agingga 89 ket maipaayan ti 30% discount; ken dagiti 90-anyos nga agpangato ket makaawat ti 35% discount.
Inlawlawag ti mammanday linteg a bayat a tumataeng dagiti senior citizen, dumakdakkel met ti gastos da iti panangtaripato ti salun-at da, agas iti maintenance, ken pang-inaldaw a panagbiag, bayat a ti kabaelan da nga agsapol ti kuwarta ket kumapsot.
