BR LA UNION — Agpanpanawagan dagiti bus company ditoy probinsiya ti La Union a kasapolanen a maingato ti plete, kasaruno ti baro a panagngato manen ti presyo ti diesel ken dadduma a paggastosan iti operasyon.
Segun kenni Onesimo Macaso, Officer-in-Charge iti Viron Transportation Company ditoy San Fernando City, La Union nabayag dan a kumidkiddaw ti panagngato ti plete gaputi agtultuloy nga oil price hike, a maysa a dakkel a paggastosan ti kompanya.
Kinuna ni Macaso, dandani rebiso laengen ti krudo iti mairem-remit iti opisina da, gaputi kadakkel ti magasgastos da iti diesel ken dadduma a paggastosan para iti operasyon.
Gaputi dayta, imbaga ni Macaso a nagkissay da ti biyahe ngem awan ti naikkat nga empleyado.
Iti agdama, ur-urayen da iti pagbanagan ti petisyon ti Philippine Bus Operators of the Philippines a fare hike iti Land Transportation Franchising and Regulatory Board wenno LTFRB, nu manu ti maaprubaran a pannakaipangato ti pasahe iti bus.
Innayon ni Macaso a maysa pay a karit iti kompanya ket iti bimmaba a bilang dagiti pasaheros nga agsal-salimetmet gaputi nangato a presyo dagiti kangrunaan a magat-gatang iti inaldaw.
