BR LA UNION – Pormal nga indeklara ti Department of Science and Technology – Philippine Atmospheric Geophysical Astronomical Service Administration a nangrugin ti tiyempo ti kalgaw wenno dry season ditoy Pilipinas ita nga aldaw, March 23, 2026.
Kagiddan daytoy iti panangiyanunsiyo ti DOST-PAGASA a nalpasen ti tiyempo ti hanging amihan wenno northeast monsoon, iti weather system a nangigubway ti nalammiis a temperatura ken serye ti panagtudtudo iti naduma-duma a paset ti pagilian.
Gaputi dayta, imballaag ti weather bureau ti nadagaang a panawen a mapasaran iti intero a pagilian.
Nupay kasta, mabalin a makapadas latta ti apagbiit a panagarbis ken nalammiis a temperatura gaputi agraraira nga easterlies.
Posible pay ti thunderstorm iti malem.
Napalagipan iti publiko a mangaramid kadagiti addang tapno maliklikan ti heat stress ken dadduma pay a sakit nga adda pakainaiganna iti nabara a panawen.
Marso-26 idi indeklara ti weather bureau iti panagrugi ti tiyempo ti kalgaw idi napalabas a tawen (2025).
