Inawagan ti Department of Social Welfare and Development dagiti boluntario a makitinnulong iti repacking ti ahensia kadagiti family food packs.
Segun kenni DSWD spokesperson, Assistant Secretary Irene Dumlao, kasapulan ti ahensia dagiti boluntario a tumulong a mang-repack kadagiti family food packs nga ad-adda pay a maipatulod kadagiti apektado a lugar.
Nupay kinunana nga adda dagiti preposition kadagiti rehion, mabalin nga adda pay dadduma a lugar a kasapulan ti kanayonan a suplay agsipud ket nasaknap ti perdisyon ti bagyo.
Segun kenni Dumlao, mabalin a kontaken dagiti boluntario ti National Resource Logistics Management Bureau ti DSWD, wenno dagiti lokal nga opisina ti ahensya.
Agtultuloy ti repacking dagiti family food packs tapno saan nga agkurang ti standby, ken dagidiay nakasagana a maiwaras kadagiti apektado nga umili.
Kabayatanna, impanamnama ti opisyal nga agtaltalinaed nga umdas ti stock ti family food packs iti laksid dagiti agsasaruno a bagyo a dimmalyasat ditoy pagilian.
Malaksid iti standby fund nga us-usaren ti DSWD ket mabalin pay a kiddawen ti kanayonan a pondo a maaramat iti panaggatang iti ad-adu pay a taraon a maiwaras kadagiti umili.
Idi naminsan nga aldaw ket nangipatulod manen ti DSWD iti 100,000 FFP iti Bicol Region.
Malaksid iti daytoy, naipatulod payen ti ahensia ti agdagup iti 120,000 nga FFP iti dadduma pay a lugar a naapektaran iti bagyo.
