Impasigurado ni DSWD Secretary Rex Gatchalian iti nalawa ken komprehensibo a suporta ti Department of Social Welfare and Development (DSWD) tapno matulungan dagiti pamilya a nakaro a naapektaran ti Bagyong Uwan ditoy Ilocos Region a makabangon ken maipatakder dagiti pagtaengan da.
Iti personal a panagsarungkar ti sekretario ditoy probinsya ti La Union ken idiay Pangasinan ket detalyado na nga imbinsa-binsa dagiti kanayunan a tulong ken programa a maipaay para kadagiti komunidad a naduprak ti bagyo, partikular iti rehabilitasion phase a mangipamaysa iti panagbangon ken panangpasayaat iti kasasaad dagiti umili.
Karaman kadagitoy dagiti proyekto para iti panangurnos dagiti nadadael nga imprastraktura ken panangipaay ti oportunidad para iti pagbiagan.
Impasigurado pay ni Secretary Gatchalian iti nainget ken agtultuloy a koordinasion dagiti DSWD Field Offices kadagiti nadumaduma nga LGUs iti rehion para iti awan sarday a panangipaay dagiti relief goods, pakairamanan dagiti taraon, inumen, ken dadduma pay a pagkasapulan, kasta met iti panangipatungpal ti Emergency Cash Transfer (ECT) program para kadagiti pamilya nga iti pagtaengan da ket partially wenno totally damaged gapo iti panagduprak ti bagyo.
Impaganetget met ti sekretaryo a dakkel a tulong dagiti food packs a maipaay ken cash assistance kadagiti pamilya tapno dagos da a makarugi nga urnusen dagiti nadadael a pagtaengan ken maisubli ti pagbiagan da.#
