Nangipaulog iti pammakdaar ken ballaag ti Department of Trade and Industry (DTI) kalpasan ti naawat da a damag seknan ti mapaspasamak iti official website da a mari-ridirect iti saan nga otorisado a gambling sites ken dadduma pay a malisyoso nga websites.
Iti maysa a waragawag ket impasiguro ti ahensya a dagitoy nga isyu ket pirmisen da a madagdagos kasaruno ti panangiyuswat ti bukod nga imbestigasyon.
Nakikoordinaren ti ahensya iti Department of Information and Communication Technology (DICT) ken uray ti Cybercrime Investigation and Coordinating Center (CICC) tapno masiguro nga agbalin a natalged iti masakbayan ti sangsangwen a problema ti platform da.
Maibasar iti inisyal a damag ket posible a gapo iti maysa nga domain name system (DNS) hijacking incident ti nagtaudan dagiti links a nasaknap a nakaapektar kadagiti areas iti website.
Iti agdama ket nangnayonen iti security measures ti DTI ken nagstrikto dan iti seguridad dagiti servers tapno masiguro a saanen a maulit pay ti kapada nga insidente.
Impatalged da met nga agtaltalinaed a sibubukel ti integridad dagiti database da ken awan ti aniaman nga private information iti nakompromiso ti isyu.
