Inarestar dagiti operatiba ti Philippine National Police (PNP) dagiti dua a pugante a Koreano babaen ti koordinado nga operasyon idiay Angeles City, Pampanga.
Inserbi ti Criminal Investigation and Detection Group (CIDG), kabinnulig ti Bureau of Immigration (BI)–Fugitive Search Unit ken dagiti international partners, iti mission orders kontra kadagiti suspek iti nagsina nga operasyon sadiay Kampupot Street ken Clark Freeport Zone.
Dagiti Koreano ket agtawen ti 45 ken 33 nga agpada pay a ‘wanted’ idiay South Korea. Maysa ket wanted iti illegal online gambling bayat a ti kadwa na met ket kaso a fraud a nakailista pay iti Interpol Red Notice.
Naammoan pay a ti agpada a suspek ket ‘overstayed’ ti estado dan ditoy Pilipinas.
Impaima metten ti PNP dagiti naarestar nga indibidwal idiay Bureau of Immigration para ti dokumentasyon ken legal proceedings, karaman metten iti posibilidad iti deportasyon.
