BR LA UNION – Arestado iti maysa a Pakistani restaurant owner ken maysa a turista a kailyanna gapu iti maipagarop a panangrames ti maysa a 28-anyos nga empleyado na idiay Olongapo City.
Binigbig ti Police Regional Office-3 dagiti suspek nga isuda Moon, 22-anyos, turista, ken Elias, 34-anyos, restaurant owner.
Kinuna ti biktima a nailinged iti nagan a Sheng, rinames isuna ti amo na ken alyas Moon alas-8 ti agsapa idiay Subic Bay Freeport Zone.
Dagus a kimiddaw ti tulong iti pulisya kalpasan ti insidente ket naaresto dagiti suspek iti maysa a follow-up operation.
Segun kenni Police Brig. Gen. Jean S. Fajardo, hepe ti Police Regional Office-3, nainget a kondinaren da iti sekswal a krimen ken binallaaganna dagiti suspek a sumango dagitoy iti nadagsen a pannusa.
Tinakderan pay ti PNP nga ipaayan da ti naan-anay a proteksiyon dagiti nakapsot ken maipaay ti hustisya iti kabiitan a panawen.
Dagiti suspek a pakistani ket naidatagan ti kaso a panaglabsing iti Republic Act 8353 (Anti-Rape Law).
