Inwaragawag ni Department of the Interior Local Government Secretary Jonvic Remulla nga adda dagiti dua a politiko manipud Amianan a Luzon a mapapati a mastermind ken financier ti nalawa nga ilegal a pabrika ti sigarilyo idiay Mexico, Pampanga.
Awan metten iti impaay a kanayunan a detalye ti Sekretaryo mainaig ti pakabigbigan dagiti politiko iti ilegal a pabrika; ditoy a naarestar ti otoridad dagiti Chinese Nationals bayat a naisalakan met dagiti 65 a Pilipino a trabahador.
Malaksid kadagiti Chinese, nangipatuloden ti Criminal Investigation and Detection Group (CIDG) ti subpoena kadagiti maysa nga immupa ti lugar ken impasigurado a sumaruno metten dagiti tallo pay nga incorporators nga agdama a mabirbirok.
Aganay sangapulo a manufacturing sites dagiti ilegal a sigarilyo ti maim-imbestigaran ti intero a pagilian.
