Inallukoy ti EcoWaste Coalition ni Manny Pacquiao a liklikan iti YiAD Paint, maysa a brand ti pintura a maipagarop a naaramid idiay China ken addaan ti nangato a lebel ti lead.
Segun iti grupo, pinatuludan da ti abiso ni Pacquiao kalpasan a natakwatan da a dagiti sumagmamano a pintura ti YiAD ket addaan ti lead a nalablabes ngem iti naituding a limitasyon ti linteg a mabalin a mangipaay ti peggad iti salun-at.
Iti insayangkat da a panagamiris kadagiti 12 a sample ti pintura, pito a produkto iti limmabes iti 90 parts per million (ppm) a limitasyon tti lead.
Addaan ti 58,390 ppm lead iti yellow paint, bayat nga iti orange paint ket addaan ti 42,690 ppm.
Dagiti nasao a produkto ket mailaklako manipud P95 agingana P99.75 tunggal lata a 450 ml.
Kabayatanna, kiniddaw ti EcoWaste nga isardeng iti panagaramid, panag-import, ken panangilako ti YiAD Paint nga addaan ti ladawan ken pirma ni Pacquiao.
Rumbeng met a masigurado no adda ti opisyal a panagaproba ni Pacquiao iti panagusar ti imahe na para iti nasao a produkto.
Imballaag pay ti EcoWaste iti publiko nga iti lead ket maysa a makasabidong a kemikal a mabalin a mangitonda ti seryoso a panakadadael nervous system partikular iti utek ti tao.###
