Madanagan ti grupo ti EcoWaste Coalition iti nasaknap a panaglako kadagiti lucky charms bracelets a napeggad unay iti salun-at ti tao gapu iti nangato a cadmium content da.
Gapu ta umas-asidegen ti Chinese New Year, nag-trending a mailako daytoy kadagiti tiendaan nga addaan iti nadumaduma a klase ti lucky charms ket pakasarakan met ti kemikal a maysa nga makasabidong a metal a mabalin a malang-ab wenno maidekket iti kudil ken pakaigapuan ti parikut iti panaganges ken pannakadadael ti bato wenno kidney.
Kiniddaw ti grupo iti gobierno nga mangipaulog da ti regulasion iti panaglako ken produksion tapno masalakniban ti salun-at ken aglawlaw ti publiko.
Segun pay ti EcoWaste, ti cadmium ket maysa kadagiti 10 a listaan ti kemikal a maibilang a kangrunaan a parikut iti salun-at ti World Health Organization (WHO).
Kabayatanna, dagiti samples nga inyuswat ti EcoWaste ket naggapo sadiay Quiapo, Manila nu sadino ket gimmatang ti grupo kadagiti 25 bracelets tapno maadal.
Natakuatan nga 18 kadagitoy ti saan a bumaba ti 10% ti cadmium content da a katupag ti 100,000 parts per million (ppm), usa ti X-Ray Fluorescence (XRF) spectrometer.
Daytoy ket maikontra iti nadutokan a bilang ti European Union para iti cadmium content nga addaan laeng iti maysa nga alahas, a rumbeng nga addaan laeng iti 0.01% a cadmium para iti tunggal alahas a mailaklako iti merkado.
Pito kadagiti pulseras a karaman iti repaso ti Ecowaste ti negatibo iti kemikal.
Pinakdaaran ti grupo ti publiko a no gumatangda kadagiti kasta a lucky charms ket siguraduen a dimmalan dayta iti testings, sertipikasion, ken namarkaan ti cadmium-safe.
