Nakipaset iti Ma-Cho Temple iti panagrambak ti Chinese New Year ita nga aldaw, Pebrero 17, 2026, idiay Brgy. II, Syudad ti San Fernando, La Union.
Iti panagsarungkar ti Bombo Radyo iti nasao a templo, na-obserbaran nga ado dagiti Chinese ken Pilipino a mangar-aramid iti wagas ti panagkakarag a maitunos iti tradisyon.
Kaadduan kadagiti tattao a bimmisita ket nakakawes ti nalabbaga a bado tapno maka-allukoy ti swerte.
Adda dagiti nakasagana a nagtimbukel a prutas a simbolo ti suerte – maysa a pammati nga inadaptar dagiti Pilipino tunggal baro a tawen.
Segun ti Board member ti Ma-cho temple, paset kadagiti pammati ket ti saan a panagapa ken panaglinis gapu ta mangpapanaw daytoy ti suerte.
Imbinglay na pay a maysa lawas iti panagsagana idiay China para ti baro a tawen bayat a ditoy Pilipinas ket maysa nga aldaw.
Ti wagas a panagkararag dagiti Chinese ket babaen ti panagparintumeng bayat nga iggem iti incense, ken ti agpangato nga asok daytoy iti mangipasimudaag iti panagturong dagiti kararag iti langit.
Saan met a rumbeng nga adda ti nakaharang a tao kabayatan ti panagkararag kas panagrespeto.
Malaksid kadagiti tradision, masursuruan met dagiti ubbing iti umno a panagdayaw ken panagkararag.###
