Itantandudo ni Senador Alan Peter Cayetano ti singasing a gakat a mangipapaay ti kanayunan a benepisyo ken proteksyon para kadagiti katulong iti balay.
Babaen ti Senate Bill No. 418 wenno Enhanced Batas Kasambahay Act, maipaay kadagiti katulong ti libre nga agas, access ti edukasyon, ken strikto a pannakaipatungpal ti karbengan da.
Mapalawa na pay ti sakop ti Republic Act No. 10361 tapno matulongan dagiti katulong iti problema da iti nababa a sueldo, kinakurang ti skills training, ken limitado a suporta pangsalun-at.
Kabayatanna, maipaayan da pay ti saan a bumaba ti linawas a maysa oras agingga innem nga oras para ti skills training wenno alternative education. Mabayadan daitoy kas paset ti working hours dagiti katulong.
Tapno masuportaran ti online learning, nabilin tiDepartment of Labor and Employment (DOLE) a mangiyuswat ti programa a mangipapaay ti internet-enabled devices.
Naidatag payen ti Kasambahay Education Inter-Agency Committee a buklen ti DOLE, Technical Education and Skills Development Authority (TESDA), Department of Education (DepEd), ken Commission on Higher Education (CHED) para ti practical modules, panangpasiguro ti access nga uray adda ti teknikal a limitasyon, ken mabalanse ti karbengan ti nagpada nga amo ken katulong.
Papigsaen pay ti gakat a ti pannakaipatungpal ti obligasyon dagiti amo nga irehistro dagiti katulong da iti SSS, PhilHealth, ken Pag-IBIG, kasta met iti kanayunan a suporta para kadagiti nakapadas ti panagabuso.
