Inadmitir ti Commission on Elections (COMELEC) a naladingitda gapu iti kaadda dagiti rupa dagiti politiko nupay saan pay nga opisial a nangrugi ti panawen ti kampania.
Segun kenni Comelec Chairman George Erwin Garcia, iti laksid daytoy, awan ti maaramidanda nangruna ta saan a saklawen daytoy ti agdama a linteg ti eleksion.
Kinunana nga iti sidong ti linteg, awan ti makunkuna a premature campaigning maibasar iti desision ti Korte Suprema a saanda pay a kandidato uray no nangipiladan iti certificate of candidacy (COC).
Maibilangda laeng a kandidato inton Pebrero 12 para iti nasional a posision idinto a Marso 28 para kadagiti lokal a posision.
Iti laksid dayta, binalakadan latta ni Garcia dagiti immuna nga epal politicians nga aghinay-hinay ken dida tagibassiten ti kinalaing dagiti Pilipino.
Immunan nga inawagan ti poll body dagiti agtarigagay a saanda a gundawayan ti masungad a piesta ni Poong Jesus Nazareno tapno maallukoy ti atension dagiti napeklan a botante.
