Imbutaktak ni sigud a Department of Public Works and Highways (DPWH) Bulacan District Engineer Henry Alcantara dagiti maipagarop a kinakusit kadagiti flood control projects a nakairamanan dagiti sumagmamano a manmanday-linteg.
Iti naisayangkat a panagdingeg ti Senate Blue Ribbon Committee ita nga aldaw, Setyembre 23, 2025, imbutaktak ni Alcantara a nairanod da Senador Joel Villanueva, Senador Jinggoy Estrada, sigud a Senador Ramon “Bong” Revilla Jr., ken Ako Bicol Rep. Zaldy Co kadagiti budget insertions ken kickbacks.
Innayon na pay, ni sigud a DPWH Undersecretary Robert Bernardo iti nangibaon kenkuana mainaig kadagiti pondo a nakailatang para kadagiti nasao nga opisyal ti gobierno, no sadino P300 million manipud iti 2024 General Appropriations Act (GAA) insertions ket para kenni Revilla a nagkandidato ti pagka-Senador ita a tawen.
Iti met kaso ni Senador Villanueva, nagkiddaw daytoy ti P1.5 billion para iti maysa a multipurpose building idi 2022, ngem P600 million laeng iti naaprobaran. Isutgapuna a binalakadan isuna ni Bernardo a mangilatang ti P150 million iti maysa a proyekto para kenni Villanueva – nga idi agangay ket naiturong kadagiti flood control projects a saan nga ammo ti manmanday-linteg.
Naisubli iti P150 million iti maysa a rest house idiay Bulacan babaen iti maysa kadagiti empleyado ni Villanueva a nabigbig iti nagan a Peng, ngem saan nga ammo ti kampona a nagtaud daytoy iti flood control funds.
Iti met biang ni Senador Jinggoy Estrada, nadakamat ni Bernardo kada Alcantara nga iti nabatbati a P355 million manipud iti 2024 budget ket maipagarop a para kenni “SJE”, ngem impaganetget ti sigud district engineer nga awan ti direkta a komunikasion na kenni Estrada.
Malaksid kadakuada, inraman na pay ni Representative Zaldy Co kalpasan a nagkita da idi Setyembre 2021 iti maysa a panagtitipon ken maiparagarop a nagsaritaan da iti panangikabil ti pondo iti distrito ni Alcantara para kadagiti flood control projects.###
