Binabalaw ni sigud a Presidential Legal Counsel Salvador Panelo ti permanente a pannakaikkat ni Vice President Sara Duterte iti National Security Council (NSC).
Inawagan ni Panelo daitoy a tignay a politically motivated ken ill-advised.
Segun iti seasoned lawyer, ti addang a naaramid ket tapno mailemmeng ti pudno a puntiria ti administrasion – nga isu ket ni VP Sara.
Malaksid kenni VP Sara, naikkat pay da dati a Presidente Gloria Macapagal Arroyo ken Joseph Ejercito Estrada.
Impaganetget ni Panelo a ti pannakaikkat dagiti dua a sigud a presidente ket tapno maabbongan ti pannakapuntiriada kenni VP Sara ken saan a lantaran nga ipakita iti publiko nga isu gayam ti kangrunaan a target da.
Immunan nga inruar ni Presidente Marcos ti Executive Order 81 series of 2024 a nagbalin basaran iti daitoy nga addang.
Maibasar iti official statement ti Malacañang idi Enero 3, 2025, makuna a saan a maibilang a ‘relevant’ wenno maiyannatop ni VP Sara kadagiti responsibilidad nga ar-aramiden ti konseho.
Segun kenni National Security Adviser (NSA) Eduardo Año, nga agserserbi met kas NSC Director General, napateg ti addang ti Presidente tapno ad-adda a mapapigsa ti pannakabukel wenno pannakaaramid dagiti polisia a mangapektar iti national security, maibasar metten iti bileg ken responsibilidad ni Presidente Marcos.
