BR LA UNION – Posible a mairwar ita a lawas iti resulta ti physical exam wenno fitness to stand trial ni sigud a President Rodrigo Duterte.
Segun iti abogado na a ni Nicholas Kaufman, naki-koordinar kadakuada ti accredited panel of medical experts nga innala ti International Criminal Court (ICC) nga inton Disyembre 5 ket mairuaren ti resulta.
Mangnamnama da a ti evaluation dagiti medical experts ket mapaneknekan nga husto da seknan iti kasasaad ti salun-at ti 80-anyos a sigud a presidente .
Isumite da inton Disyembre 12 ti sungbat iti findings ti medical experts of panel.
Innayon pay ni Kaufman a dismayado ken saanen a nasorpresa ti sigud a presidente idi maamwan na nga imbasura ti ICC Appeals Court ti kiddaw da nga interim release.
Mangnamnama ti defense team ti sigud a presidente a mairuar iti desisyon seknan iti petisyon da nga awan ti hurisdiksyon ti ICC iti kaso ni Duterte.
Inton Enero 27 sumaruno a tawen a maamwan ti sumagmamano a resulta ti petisyon da kalpasan iti judicial recess ti ICC.
Nakadintine ti sigud a presidente idiay ICC gapu iti sangsangwen na a kaso a crime against humanity idi naipatungpal ti laban kontra iligal a droga.
