BR LA UNION – Pinirmaan ni President Ferdinand Marcos Jr. iti Republic Act 12252 a mang-amyenda iti Investors’ Lease Act.
Iti sidong ti linteg, palubosan dagiti foreign investors nga agupa ti pribado a daga ditoy Pilipinas ti agingga 99 a tawen para iti negosyo kas iti pabrika, planta, agro-industrial projects, turismo, ken dadduma pay a proyekto makatulong iti ekonomiya.
Ngem adda kabuyog a kondisyon ti panagupa: kasapolan a rehistrado iti investment iti maysa a government agency kas ti Board of Investments, nalawag iti kaatiddog ken kalawa ti kontrata, ken rumbeng a dagus a marugyan iti proyekto.
Awtomatiko a makanselar ti kontrata nu saan a natuloy iti naituding a panawen wenno nausar iti dakes a wagas ti daga wenno lote.
Amin a lease ken sublease ket nasken nga irehistro iti Registry of Deeds tapno agbalin a legal ken protektado.
Saan met nga awtomatiko a na-renew iti kontrata. Kasapolan ti katulagan ti agpada a benneg ken pammaneknek nga adda benepisyo a naipaay iti ekonomiya ken kagimongan iti investor sakbay a mapaway-wayan.
Para iti tourism projects, dagiti laeng adda puonan na a saan a bumaba iti lima a milyon a dolyar ti mapalubosan, ken 70% ditoy ket rumbeng a maiserrek iti uneg ti tallo a tawen.
Mapalubosan iti sublease nu adda pammalubos ti akinkukua ken rehistrado laketdi.
Tarigagay ti nasao a linteg a maka-allokoy iti ad-adu a foreign investments, bayat a masiguro a protektado iti daga ken interes dagiti Pilipino.
