Kinondenar dagiti mammanday-linteg ti Makabayan Bloc ti saan nga autorisado nga iseserrek iti kabaybayan ti Pilipinas ti US carrier strike group one nga idauluan ti USS Carl Vinzon iti nagbaetan ti Leyte ken Mindanao idi Disiembre 26, 2024.
Segun kenni Assistant Minority Leader ken Gabriela Partylist Representative Arlene Brosas, ti inaramid ti US warship ket intrusion ken iti basta lattan a panangipakita ti kabaelan da ti militar ket mabalin a panaglabsing iti kinasoberano.
Impapilit ti Kongresista, ti panagdalyasat ti US carrier strike group iti kabaybayan ti Pilipinas ket nalawag a pannakibiang ken panaglabsing iti wayawaya ti pagilian.
Impaganetget ni Brosas a ti nuclear-capable warship nga escorted by USS William Lawrence, USS Sterett ken USS Princeton ket mangpataud iti nakaro a peggad kadagiti komunidad.
Binabalaw pay ni Brosas ti gobierno gapu iti panangipalubos iti Pilipinas nga agbalin a US military outpost imbes a idepensana ti soberano ti pagilian.
Impasingked ni Brosa a ti Pilipinas ket saan a war playground wenno maysa nga extension ti Pentagon.
Ipaganetget ni Brosas a ti kinasoberano tayo ket saan a mapagnunumuan ken masapul nga ilaban ti panagwaywayas manipud iti maipagarup a panangtengngel dagiti Amerikano.
