BR LA UNION – Sukimaten dagiti otoridad iti gaming ken chat history ti Grade 8 student a suspek iti pammaltog idiay Ateneo de Zamboanga University tapno madetermina iti posible a motibo ti insidente.
Dua ti natay iti pammaltog, kabilang ti maysa nga estudyante ken ti mismo a suspek.
Segun kenni Interior Secretary Jonvic Remulla, sukimaten dagiti imbestigador iti gaming history, chat messages ken dadduma pay a digital records ti suspek tapno makabukel da ti mas kumpleto a forensic analysis iti napasamak.
Segun kadagiti otoridad, in-livestream pay ti suspek iti insidente babaen ti inusar na a first-person perspective a kapad-pada ti maysa a video game.
Agtultuloy ti imbestigasyon nu kasatnu a naiserrek iti pagadalan dagiti dua a paltog nga imet ti Grade 8 student.
Segun iti pulisya, maysa a regular a pistol ken maysa pay a paltog nga addaan ti conversion tapno aglanga nga assault rifle iti ikot ti suspek.
Narekober pay iti bag a mapapati a nausar iti pannakaiserrek dagiti paltog ken adda pay nakita a magazine ti bala iti uneg daytoy.
Kabayatanna, maysa nga opisyal ti Bureau of Customs idiay Zamboanga ti naikkat iti puwesto kalpasan a rimwar a nakarehistro kenkuana ti maysa a paltog a nasar iti krimen.
Agtultuloy ti panangamiris dagiti otoridad iti CCTV footage ken waragawag dagiti testigo tapno maamwan ti pudno a napasamak.
Mainaig ti daytoy, nangipeksa ti nakaru a panagliday ni Remulla ken nagpanawagan iti publiko nga ipa-igid pay laeng ti politika ken unaen ti pagimbagan ken kinatalged dagiti agad-adal.
Inallokoy na dagiti gun owner nga agbalin a responsable iti panagidulin ti paltog tapno saan a maala iti saan a maiparbeng a tao.
