Pinasingkedan ti Department of Public Works and Highways (DPWH) a mabalin a dumanon iti P27-B ti magastos iti baro a pasdek ti Senado a maibangbangon sadiay Fort Bonifacio, Taguig City.
Kabayatan ti panangrepaso ti Senate Committee on Accounts iti New Senate Building Project, kinuna ni Department of Public Works and Highways Assistant Secretary Antonio Molano Jr. a dumanon daitoy iti P20 agingga P27-B pakairamanan iti gasto ti daga ken inflationary cost.
Kinuna ni Molano nga agarup 20 agingga iti 25% ti inflationary cost.
Kinuna met ni Senador Alan Peter Cayetano, Chairman ti Senate Committee on Accounts, a mabalin nga umadu pay ti magastos iti P26 agingga iti P29-B gapu iti posible a 25-30% inflationary cost dagiti materiales ken nangatngato a sueldo dagiti mangmangged.
Saan nga naikankano ti nagdebatean da kenni Senador Nancy Binay maipapan iti gastos ti proyekto no sadino nga impapilitna a P23.3-B ti magastos idinto a segun kenni Binay ket P21.7-B laeng.
Tapno malawlawagan ti kasasaad, inted ni Cayetano ti pannakabingbingay ti dagup a gastos iti budget ti proyekto ken ti epekto ti panangusar iti “conservative 20 percent inflationary cost” nga inkeddeng ti Department of Public Works and Highways.
Gapu iti variation orders, inbinglay ni Cayetano a ti napattapatta a gastos para iti phase 1 ket ngimmato iti agdama iti P8.6-B manipud iti orihinal a napattapatta a gastos nga P8.067-B
Innayon pay ti senador a ti budgetary cost estimate ti phase 2 ket mabalin a maipangato iti P2.375-B ken ti P10.33-B cost ti phase 3 ket agdaman iti evaluation na.
Sakbay a malpas ti repaso, kiniddaw ni Cayetano iti ahensia a mangisubmitir iti baro a cost estimate para iti nabati a paset ti konstruksion a maibasar iti presio dagiti materiales ita a tawen.
Kayat met ti senador ti mangparnuay iti baro nga organizational chart tapno naparpartak ti panagaramid iti desision iti pasdek.
Maudi a pammilin ti senador ket kumpletuen amin a kasapulan a dokumento tapno makita no ania pay ti masapul nga aramiden.
