CITY OF SAN FERNANDO, LA UNION – Inirutan ti Gobierno Ciudad ti San Fernando iti panangipatungpal dagiti pagalagadan kas pannakipamaysa iti Safer Cities Initiative ti Department of the Interior and Local Government (DILG) tapno masigurado iti kinatalged ken pagsayaatan ti komunidad.
Kabinnuligda ti City of San Fernando Police Station nga agmonitor ken mangipatungpal dagiti nasao a paglintegan.
Maysa kadagiti pagalagadan ket iti panangiparit ti panaginom ti aniaman a kita ti arak kadagiti kalsada, ruar ti pagtaengan, karaman iti panag-okupar kadagiti dalan ken sidewalk, kasta met iti panangikabil ti lamisaan ken tugaw iti pampubliko a lugar.
Palagip ti ciudad nga agsuot ti disente a bado uray adda iti pagtaengan wenno iti pampubliko a lugar kas panangipakita ti respeto ken disiplina iti komunidad.
Maiparit pay iti napigsa nga uni ken panag-videoke manipud alas-diyes ti rabii tapno mapagtalinaed ti kinaulimek kadagiti komunidad, ken saan met a mapalubosan dagiti menor de edad nga agpaut iti ruar ti pagtaengan.
Mangnamnama iti lokal a gobierno ti kooperasion ken panagtitinulong ti tunggal maysa tapno mapagtalinaed ti urnos, talna, ken kinatalged iti intero a Ciudad ti San Fernando. (Report by Bombo Jordan)
