Kalpasan iti tallo nga aldaw a panagpukaw ket nasarakan met laeng ti maysa nga Grade 11 student idiay Tarlac, City idi kalman September 30, 2022.
Maipalagip a pimmanaw iti balayda ni Divine Pucayan Sul-a, Grade 11 iti San Gabriel Vocational High School ken residente ti ili a San Gabriel, La Union idi bigat ti September 27, 2022 aldaw ti Martes.
Iti pannakiuman ti Bombo Radyo La Union kenni Roberto Sal-a ti ama ni Divine, kinuna a gaputi kanayon a panagung-unget ti panginaen ti anak na ti rason iti panagtalaw daytoy.
Segun kenni Roberto, nakitada ti post iti managan Gina Soriano Dela Cruz iti social media a ti anak na ket adda idiay Gerona, Tarlac.
Saandan a nagsayang ti oras ket dagusda a nagturong idiay Tarlac kaduada ni San Gabriel Mayor Lanny Carbonel ken dua a kameng ti San Gabriel, Police Station.
Napalaos kuna na ti ragsak daytoy idi naginnarakopda ti anak na bayat nga isu ket nakidagus iti pagtaengan ti maysa a managan Mylene idiay Tarlac.
Dagusda a nagawid ditoy La Union apaman a maalada ti anakna.
Iti agdama ket adda ti anak na iti balay ti pangamaen ti nasao a tatang.
