Winaya-wayaanen ti Hamas dagiti tallo a kautibo nga Israeli manipud Gaza iti kabaruan nga hostage-prisoner swap idi kalman ti Sabado, Pebrero 1, 2025.
Dagitoy ket nabigbig nga isuda Yarden Bibas, 34-anyos, Ofer Kalderon, 53-anyos, a nakaballasiw iti beddeng nga agsubli kadagiti ay-ayatenda idiay Israel ken maysa nga US-Israeli citizen a ni Keith Siegel, 65-anyos.
Daytoy ti maikapat a batch dagiti nawayawayaan nga kautibo manipud iti sidong ti Hamas sipud idi nagbalin nga epektibo ti ceasefire deal iti nagbaetan da iti Israel idi Enero 19, 2025.
Kas kasukat ti pannakairuar dagiti kautibo nga Israelita, naikeddeng met a mawayawayaan dagiti 183 Palestinian prisoners a nakakulong kadagiti pagbaludan sadiay Israel.
Nasurok sangagasot kadakuada ti taga-Gaza ken agarup 70 kadakuada ti nasentensyaan iti napaut wenno tungpal biag a pannusa.
