BR LA UNION – Inaprubaran ti House Committee on Justice iti committee report seknan iti dua nga impeachment complaints kontra kenni VP Sara Duterte, ken inrekomenda ti komite iti posible a pannnaka-patakyas na iti puwesto kalpasan a nakita nga adda probable cause.
Iti panagdengngeg idi kalman, Lunes, indatag ni Deputy Speaker David Suarez iti mosyon tapno aprubaran iti amended report a naglaun metten ti articles of impeachment.
Kasaruno daytoy, nangisayangkat ti nominal voting ni Committee Chairperson ken Batangas Rep. Gerville Luistro, ket ti resulta, 55 kadagiti 55 a miyembro a dimmar-ay ket nagbotos a pabor iti pannaka-aprubar.
Maisumite ti committee report idiay House Committee on Rules tapno mairaman iti order of business ti plenaryo.
Apaman a matalantan iti plenaryo, mabalinen nga sponsoran dagiti opisyal ti komite ken kariten ti sumagmamano a mammanday linteg.
Sakbay na, walo a panagdengngeg iti naisayangkat manipud Marso agingga Abril, kabilang ti pannaka-amiris iti sufficiency in form ken substance, panag-isyu ti subpoenas, ken panagdengngeg kadagiti alegasyon kas ti maipagarop a misuse ti confidential funds, SALN issues, ken waragawag seknan iti pangta ti biag iti sumagmamano nga opisyal ti gobyerno.
Kalpasan ti panagdengngeg, nagkaykaysa a pinasingkedan ti komite iti kaadda ti probable cause, adda pay report a dandani amin a miyembro ket nagbotos a pabor.
Segun kenni Luistro, posible nga inton Mayo 11 a maisango idiay plenaryo iti isyu para iti pinal a desisyon ti sibubukel a kamara.
