Impaganetget dagiti lider ti kamara a kasapulan a repormaen ti sistema ti party-list tapno masigurado ti pudno a representasyon dagiti naisina a sektor iti Kongreso.
Segun kenni Lanao del Sur Rep. Zia Alonto Adiong, saan a rumbeng a pagsaritaan ti pannakarakrak ti sistema gapu ta nakailanad iti Konstitusion ti panggep daytoy nga ikkan ti representasyon dagiti nadumaduma a sektor.
Kinuna met ni Tingog Party-list Rep. Jude Acidre, a tarigagay ti House Bill 9906 a mangikeddeng kadagiti nalawag a pagrukodan tapno masigurado ti pudno a representasyon dagiti party-list organizations iti sektorda.
Iti sidong ti singasing, mabingay dagiti party-list organizations iti tallo a kategoria: advocacy, sectoral ken regional.
Segun kenni ACT-Teachers Party-list Rep. Antonio Tinio, mangikeddeng met daytoy kadagiti kualipikasion para kadagiti mayat a mangibagi iti partikular a sektor, pakairamanan ti kapadasan ken nagapuananda.
Kabayatanna, impaganetget ni 4Ps Party-list Rep. JC Abalos ti kinapateg ti konsultasyon ti publiko tapno mailasin dagiti problema iti sistema ken makabukel ti maitutop a reporma.
Kalpasan ti umuna a konsultasion iti Butuan City, nakaituding a mangisyangkat iti panagtataripnong iti Iloilo City ken Metro Manila tapno maala met ti panangmatmat dagiti dadduma pay a sektor.
Karaman iti reporma iti party-list system kadagiti prioridad a gakat ti Legislative-Executive Development Advisory Council (LEDAC).
