Nangipila ni Senate Committee on Social Justice, Welfare, and Rural Development. Chairperson Sen. Erwin Tulfo ti singasing a linteg a mangipapaay ti kanayunan a proteksiyon kadagiti mangmangged a posible a maawanan ti trabaho gapu iti panagusar ti artificial intelligence (AI) ken automated systems dagiti kumpanya.
Iti sidong ti Senate Bill No. 2563, kayat ni Tulfo nga amyendaran iti Article 298 ti Labor Code of the Philippines tapnu mangituding dagiti proteksion kadagiti empleyado a maikkat gapu iti AI-driven automation.
Segun kenni Tulfo, nupay saan a maliklikan iti panagrang-ay ti teknolohiya, saan a rumbeng nga ipasa laengen kadagiti mangmangged iti epekto daitoy, aglalo nu nakaasa iti pamilya ti pagbiagan da.
Iti sidong ti singasing, mabalin laeng nga ikkaten wenno ikkatan iti trabaho ti maysa nga empleyado gapu iti panangipatungpal ti AI nu mapaneknekan a maisayangkat daitoy iti ubra nga addaan ti nasaysayaat a tarigagay babaen ti nasao a teknolohiya.
Kasapulan pay nga adda iti lehitimo a rason iti kumpanya, kas iti panagsalimetmet ti gastos wenno panangurnos ti operasyon, ken awanen ti dadduma nga opsiyon malaksid iti panangusar ti AI, nga agresulta iti pannakaawan ti trabaho ti empleyado.
Itudtuding pay ti singasing iti panagusar ti patas ken inkalintegan nga allagaden iti panagpili dagiti empleyado a maikkat.
Malaksid daitoy, mabilinan dagiti employer a mangipaay ti inkalintegan a separation pay, gundaway para iti reskilling wenno panagsanay manen, ken posibilidad a makaakar iti dadduma a trabaho dagiti apektadong empleyado.
Kasapulan met nga adda iti abiso ken konsultasyon sakbay nga ipatungpal iti panagikkat.
Impaganetget ni Tulfo a rumbeng nga agsikap dagiti kumpanya a mapagtalinaed iti trabaho dagiti empleyado da laksid iti panagusar ti AI, agsipudta saan laeng a karera nu di ket karaman pay iti pagbiagan ti pamilya iti maapektaran daitoy nga addang.
