BR LA UNION – Imbasura ti Appeals Chamber ti International Criminal Court (ICC) idi Miyerkules (Abril 22 ) ti apela ni sigud a presidente Rodrigo Duterte kontra iti immuna a desisyon a mangbigbig iti hurisdiksyon ti pagukuman iti kaso na a crimes against humanity.
Maibasar iti desisyon a binasa ni Judge Luz del Carmen Ibáñez Carranza, pinagkedkedan ti Appeals Chamber ti amin nga uppat a grounds of appeal ti depensa.
Gaputi dayta, maibilangen a “moot” ti nasao a kadawatan para iti dagus ken awan kondisyon a panangruk-at kenni Duterte.
Iti pakabuklan, kinumpirma ti pagukuman iti immuna a ruling ti Pre-Trial Chamber I nga adda hurisdiksyon ti ICC iti kaso.
Saan a dimmar-ay ni Duterte iti panagdengngeg kalpasan a kiniddaw na nga i-waive ti presensya na, ken imbagi laengen dagiti abogado na.
Maipalagip nga immuna a pinagkedkedan ti Pre-Trial Chamber I iti panangkontra ti kampo ni Duterte iti hurisdiksyon ti ICC, iti panangibaga a nangrugin ti imbestigasyon sakbay pay a pormal nga immikkat ti Pilipinas iti Rome Statute.
Iti biang ti depensa, impaganetget ti legal team na nga awan ti umdas a basaran tapno ituloy ti kaso ken kiddawen ti dagus a panangwaya-waya iti sigud a presidente.
Kabayatanna, segun iti ICC Assistant to Counsel a ni Kristina Conti, agtultuloy iti proseso iti Pre-Trial Chamber I ken namnamaen a mairwar iti sumaruno a desisyon inton Abril 28, 2026 nu ituloy ti panangusig iti kaso a crimes against humanity seknan iti war on drugs ti administrasyon ni Duterte.
