BR LA UNION – Inyanunsyo ti Commission on Elections (Comelec) a nalpasen ti imbestigasyon iti maipagarop a saan a panangideklara ni Senador Rodante Marcoleta ti sumagmamano nga election donors iti Statement of Contributions and Expenditures (SOCE) para iti eleksiyon idi Mayo 2025.
Segun kenni Comelec Chairman George Erwin Garcia, nalpasen ti Political Finance and Affairs Department (PFAD) iti imbestigasyo ken nakasagana a mangirwar ti resolusyon.
Iti counter-affidavit na, impaganetget ni Marcoleta a dagiti donasyon ket naipaay sakbay a naideklara a kandidato, maiyannurot iti desisyon ti Korte Suprema iti kaso a Penera vs. Comelec, a mangibagbaga a maibilang laeng a kandidato iti maysa nga aspirant iti umuna nga aldaw ti campaign period.
Idi Nobyembre 2025, nangiruar ti Comelec ti show cause order seknan iti maipagarop a saan a kumpleto a panangideklarea ti donors ken iti makunkuna a discrepancy iti baetan ti SOCE ken Statement of Assets, Liabilities and Network (SALN).
Immunan nga inaklon ti senador a saan-nan nga inraman ti sumagmamano a kontribusyon agsipudta kimmiddaw ti anonymity dagiti donor.
Iti SOCE, nakailaad a gimmastos isuna ti P139.9 milyon iti kampanya, mas nangatngato ngem iti indeklara na a net worth a P51.9 milyon, ken nakailista ti zero donations.
