Nasaysayaat nu mabaybay-an ti Armed Forces of the Philippines (AFP) nga isayangkat ti bukod da nga imbestigasyon mainaig kadagiti tattao a karaman iti saan nga umiso a pannakausar ti confidential fund ni Vice President Sara Duterte.
Segun kenni House Deputy Majority Leader Paolo Ortega V ti La Union nga adda ti bukod a proseso iti uneg ti AFP a saan a rumbeng a maipluwensyaan iti ruar.
Kinunana a sumagmamano kadagiti miembro ti Vice Presidential Security and Protection Group (VPSPG) ket karaman iti disbursement ti confidential funds ti Office of the Vice President (OVP) ken Department of Education (DepEd) a sigud nga indauloan ti Bise Presidente.
Maibasar kadagiti damag, mangbukbukelen ti AFP ti maysa a fact-finding committee tapno imbestigaran ti akem da sigud nga VPSPG Commander Colonel Raymund Dante Lachica ken ti deputy commander na a ni Colonel Dennis Nolasco iti panangaramat ti nasao a pondo.
Iti panagdengngeg ti Kamara idi Disyembre 2024, nadakamat nga isuda Lachica ken Nolasco ti responsable iti panangiruar ti minilyon a pisos a gatad ti confidential funds ni Duterte babaen ti OVP ken DEPED.
Impaganetget pay ni Ortega ti kinapateg ti kaadda ti balense a legislative oversight ken wayawaya ti AFP a makaimbestigar.
