LA UNION – Target ti Senado a rugyan ti imbestigasyon seknan iti war on drugs iti sumaruno a lawas sakbay nga agsubli iti sesyon ti Kongreso inton Nobiyembre.
Inlawlawag ni Senate President Francis “Chiz” Escudero, tarigagay na a bayat a naka-recess iti kongreso, maisayangkat iti war on drugs investigation, agsipudta inton agsubli ti sesyon ket matalantanen ti gakat a pondo para iti sumaruno a tawen.
Segun pay iti Senate President, posible a ma-assign iti drug war investigation iti Blue Ribbon committee nga idaulwan ni Sen. Pia Cayetano wenno iti Justice Committee nga idaulwan ni Sen. Koko Pimentel.
Nupay nagtalinaed kunana nga option iti rekomendasyon ni Sen. Risa Hontiveros a mangdutok ti Senate Committee of the Whole a mangisayangkat ti imbestigasyon, ngem saan a pinaboran daytoy ti kaadwan a senador.
Kabayatanna, nakatuding a makisinnarak ita a weekend ni Sen. Escudero kada Sen Ronald Dela Rosa, Sen. Bong Go ken dadduma pay a Senador tapno isapinal ti nasao nga isyu ken masiguro iti patas ken awan ti pan-panigan nga imbestigasyon.
Maipalagip nga immunan nga insingasing da Sen. dela Rosa ken Go a mangiyuswat ti bukod nga imbestigasyon ti senado seknan iti war on drugs ni sigud a Presidente Rodrigo Duterte kalpasan a mairaman iti agtultuloy nga imbestigasyon ti House Quad Committee.
