Nangisayangkat ti Transport Police Department ti Kazakhstan ti imbestigasion kalpasan ti panagsuwek ti eroplano ti Azerbaijan Airlines a J2-8243 iti asideg ti Siudad ti Aktau.
Naggapu ti eroplano iti kabesera a Baku iti Azerbaijan ken agturong iti rehion ti Chechnya, Russia.
Ti nadakamat nga insidente ket nakatayan ti 38 a tattao ken 29 ti nakalasat pakairamanan ti dua nga ubbing ken 11 kadagitoy ti kritikal ti kasasaadda.
Nabirokanen dagiti otoridad ti black box ti nadakamat nga eroplano ken ammuen dan ti pudno a rason ti aksidente.
Agdagup iti 62 a pasahero ken lima a tripulante iti karga ti nasao nga eroplano, 37 kadagitoy ti umili ti Azerbaijan, innem ti taga-Kazakhstan, tallo ti taga-Kyrgyzstan, ken 16 ti taga-Russia.
Gapu iti pasamak, insuspende ti Azerbaijan Airlines ti amin a panagtayab manipud Baku agingga iti Grozny ken Makhachkala agingga a malpas ti naan-anay nga imbestigasion.
