LA UNION – Pagpalawagen ti pulisya iti kahera ti Mami King gapu ta saan a pudno iti imbaga daytoy a rimmaot dagiti holdaper iti paglaklakuanda idiay Barangay Sevilla, syudad ti San Fernando, La Union.
Iti pannakiuman ti Bombo Radyo kenni C/Ins. Silverio Ordinado, spokesperson ti La Union Police Provincial Office (LUPPO), kinunana nga agparparang ita iti imbestigasyon ti San Fernando City Police nga incosistent dagiti nagbalin a salaysay ti kahera iti resulta ti panagsukimat dagitoy.
Mabuya kinunana kadagiti CCTV footages a maysa a lalaki ti maipagarup a simmek ken nangala iti kwarta a naglakkuan ti mami kabayatan a matmaturog daytoy.
Maipagarup a nakalugan iti maysa a bisekleta ti nasaan pay a nabigbig a suspek a dagus a naglibas kalpasan a maalana dagiti pirak.
Sigun pay kenni Ordinado, maimbestigaran pay laeng ken pagpalawagenda ti kahera gapu iti saanna a panangibaga ti pudno kadagiti imbestigador.
Immuna iti daytoy, base ti salaysay ti kahera iti San Fernando City Police Office ket maysa manipud iti uppat a suspek ti maipagarup a nangipasarang ti paltog kenkuana kabayatan nga adda daytoy iti uneg ti pwestoda kasaruno iti panangitaray ti P6,000 cash ken maysa a cellphone.
Maipagarup a naglibas dagiti holdaper a naglugan iti maysa a traysikel kalpasan ti krimen. (Abs Flores)
