BR LA UNION – Inbutaktak ni Department of the Interior and Local Government (DILG) Secretary Jonvic Remulla a maipagarop a ginandat ti maysa a kontraktor ken maysa a kongresista a maysa met laeng a kontraktor wenno nabirngasan a “cong-tractor” a pasoksokan isuna ken ti kabsat na a ni Ombudsman Jesus Crispin Remulla ti pakabuklan a P2 billion iti tengnga ti imbestigasyon ti anomalya iti flood control projects.
Segun kenni Sec. Remulla, naidalan ti gandat a panagpasoksok kadakuada babaen ti emissaries ti kontraktor ken ti nakatugaw a Cong-tractor, maysa a grupo kunana a Visayas-Mindanao group bayat a ti maysa ket Luzon group.
Mipagarop a kumidkiddaw da ti tulong iti sangsangwen da a kaso, maikkat iti listaan ken bay-an a makapag-piyansa.
Inlawlawag ti sekretaryo a saan a dagus a natiliw dagitoy iti laksid ti gandatda a pasuksokan dagiti opisyal gaputa nalakada a mailibak ti gandat a panagpasuksok kadakuada a ‘hearsay’ wenno parbo laeng daytoy gaputa saan a direkta a naidiaya ti pasuksok.
Kinunana pay a saan a nag-reach out ti sekretaryo iti nasao a kongresista ken iti kontraktor kalpasan ti insidente gaputa saanna nga am-ammo a personal dagitoy ken saan metten a sakop ti pagrebbenganna kas DILG Secretary.
Kabayatanna, idi napagsaludsodan maipapan iti reaksion ni Ombudsman Remulla mainaig iti diaya a pasuksok, kinunana a nagkatawa ti opisyal ken kinunana a bassit ti panagkit-kita da kadakuada.
