BR LA UNION – Umaboten ti innem (6) iti naipadamag a natay iti panagduprak ti Super Typhoon Uwan ditoy Pilipinas.
Kinumpirma ti National Disaster Risk Reduction and Management Council (NDRMMC) ita nga aldaw ti Martes, Nobyembre 11, a tallo ti nairekord a natay manipud Cagayan Valley ken saggaysa manipud Bicol, Western Visayas ken Eastern Visayas. maibasar iti datos ti ahensiya.
Bayat nga agdagup ti 13 a tattao iti naireport a nasugatan.
Nasurok met a dua a milyon nga indibidual wenno kaibaugan ti nasurok 600,000 a pamilya ti apektado manipud Ilocos Region, Cagayan Valley, Cordillera Administrative Region, Central Luzon, Metro Manila, CALABARZON MIMAROPA, Bicol, Western Visayas, Negros Island Region, Eastern Visayas, Zamboanga Peninsula, Northern Mindanao, Caraga, ken Bangsamoro Autonomous Region in Muslim Mindanao.
Ti kangatuan a bilang dagiti naapektaran nga indibidual ket nairekord idiay Bicol a dumanon ti nasurok a maysa a milyon, sumaruno ti Negros Island Region ken Eastern Visayas.
Kadagiti naapektaran a pamilya, nasurok a 200,000 ti adda pay laeng kadagiti evacuation centers bayat a dagiti dadduma a nasurok 78,000 a pamilya ket nagkamang kadagiti dadduma a lugar.
Iti damage assessment ti ahensiya, nasurok nga 4,000 a babbalay ti naipadamag a nadadael, a pakairamanan ti nasurok 3,000 a partially damaged idinto a nasurok a 700 ti totally damaged.
No maipapan iti suplay ti kuryente, nasaknap pay laeng a mapaspasaran ti pannakapukaw ti koryente iti 394 a lugar a naapektaran iti bagyo.
Segun iti NDRRMC, nasurok a P48 million ti naipaayen ti gobierno a tulong para kadagiti biktima ti bagyo.
Itay agsapa ti Martes, rimmuaren ti Bagyo Uwan iti Philippine Area of Responsibility ngem manamnama a sumrek manen iti PAR, kalpasanna, agturong idiay Taiwan.
