BR LA UNION – Nangipeksa ti kinasagana ti Iran, babaen kenni Iranian Ambassador to the Philippines Yousef Esmaeilzadeh, a tumulong iti Pilipinas kagiddan ti kiddaw ti gobierno nga ituding ti pagilian kas “non-hostile” tapno masigurado ti natalged a panaglabas dagiti barko nga addaan bandera ti Pilipinas ken suplay ti langis .
Segun kenni Palace Press Officer USec. Claire Castro, inaramid ti Iranian official ti statement bayat ti pannakitaripnong na kada Secretary of Foreign Affairs Maria Theresa Lazaro ken Energy Secretary Sharon Garin.
Inladawan ni Castro ti miting kas nabara ken silulukat, a mangipakita iti kinasagana ti Iran a makitinnulong.
Kiniddaw ni Lazaro a pormal a bigbigen ti Pilipinas kas “non-hostile country” ken masigurado ti natalged a panaglabas dagiti barko ken oil shipments, a nasken para iti seguridad dagiti seafarers ken suplay ti enerhiya ti pagilian.
Iyur-urnos metten ti Department of Energy dagiti detalye tapno dagus a maipatulod dagitoy babaen iti diplomatic channels, bayat a ni Lazaro ket manamnama a makisarita iti Iranian Foreign Minister tapno masigurado ti maysa a katulagan iti kangatuan a lebel.
Dagus nga inreport da Lazaro ken Garin ti nasao a banag kenni Presidente Ferdinand Marcos Jr.
