LA UNION – Nagpalagip ita ti Department of Education (DepEd) Regional Office-1 kadagiti amin a pampubliko a pagadalan nga ikkan ti konsiderasyon iti pammati dagiti estudyante a saan a mangramrambak iti Christmas.
Iti pannakiuman ti Bombo Radyo kenni DepEd Regional-1 Information Officer Darius Nieto, kinunana a kasapulan nga irespeto iti sursuruten ti relihiyon iti tunggal agad-adal lalo no saanda a makipaset iti panagrambak iti Paskua.
Sigun kenni Nieto, saan met a kasapulan a piliten dagiti nasao nga ubbing nga agaramid iti proyekto nga addaan ti pakainaigan ti Christmas kas ti lanterns, dekorasyon wenno aniaman pay a kita daytoy.
Nagpalagip pay ti opisyal kadagiti mangimatmaton iti pagadalan a masapul a maipatungpal latta ti “no colletion policy” kadagiti eskwelaan.
Innayon pay ni Nieto a masapul a liklikan met dagiti teachers iti makibiang maipapan iti aktibidad ti Parents-Teachers Association (PTA) nga addaan iti pakainaiganna ti kwarta wenno kontribusyon para iti Christmas Party.
Iti panangisayangkat ti aktibidad maipapan ti Paskua wenno Christmas party, sigun kenni Nieto ket nasken a seguraduen a saan met a maikompromiso iti trabaho ti uneg ti eskwelaan wenno opisina. (Abs Flores)
