BR LA UNION – Kinumpirma ni U.S. President Donald Trump idi Martes (local time) nga immannugot ti Israel kadagiti kondisyon para iti maysa nga 60-aldaw a tigil-putukan idiay Gaza.
Iti agdama, agsagsagana ni Trump a makitaripnong kenni Israeli Prime Minister Benjamin Netanyahu idiay White House inton Lunes, Hulyo 7 iti tarigagay a tulongan ti dua a benneg nga agtinnunos iti katulagan para iti panangwaya-waya dagiti hostage.
Segun kenni Trump, iti Qatar ken Egypt iti mangidatag ti pinal a proposal, a nasken nga awaten ti Hamas, agsipudta nu saan ket posible a kumaru laeng ti riribok iti rehiyon.
Saan met dinakamat ni Netanyahu dagiti detalye iti panagbisita na idiay Washington, malaksid iti trade deal ken isyu idiay Iran.
Nupay positibo iti waragawag, arigna nga adda panagdudua latta ti Hamas iti diaya ni Trump nga inawagan da kas “best and final offer.”
Maipalagip a naminsanen a napaay iti peacetalks gapu iti saan a panagtinnunos ti agsumbangir a benneg, iti panaggibus ti riribok kas paset ti ceasefire.
Kabayatanna, inallokoy ni US President Donald Trump iti Hamas nga awaten ti “final proposal” para iti 60-days ceasefire idiay Gaza, kasaruno ti pananganamong ti Israel kadagiti kondisyon ti katulagan.
Iti social media post ni Trump, imbaga na a ti diaya ket itulod dagiti mangibagbagi ti Qatar ken Egypt.
Segun kenni Trump, ranta ti temporaryo a tigil-putukan tapno rugyan manen ti saritaan kapya a manggibus ti riribok ken mawaya-wayaan dagiti kawtibo kasukat dagiti Palestinian prisoners ken bangkay dagiti natay a militante a Palestinian.
