Naipadamag ti pannakatantan ti ceasefire deal idiay Gaza gapo iti nagduma a posisyon dagiti partido mainaig iti kinalawa ti panag-atras dagiti pwersa ti Israel manipud Palestinian enclave.
Segun iti damag manipud Palestine ken Israel, nagraira ti saan a direkta nga negosasyon para ti 60-day ceasefire deal nga intandudo ti Estados Unidos a namnamaen met ni U.S. President Donald Trump a napintas iti pagbanagan na.
Kinuna dagiti medics iti lugar ket napasamak ti maysa a mass-shooting a nakatayan ti 17 a tattao kalpasan a nag-open fire ti tropa ti Israel kabayatan a mangal-ala ti ayuda ken rasyon dagiti taga-Gaza.
Impadamag met ti United Nations ti kapada a sitwasyon a nagkuna a 800 a tattao ti pimmusay iti las-ud laeng ti innem a lawas.
Segun kadagiti nakakita, napalpaltogan dagiti tattao iti ulo ken bagi da ken nabalkot dagitoyen ti puraw a shroud kabayatan ti panagladingit dagiti kakabagian da idiay Nasser Hospital. Inaklon met ti militar ti Israel iti insidente ken inlawlawag a warning shots laeng iti napasamak ken awan met iti tinamaan da a tattao.
Tultulongan dagiti delegasyon manipud Israel ken Hamas dagiti saritaan ti panagibus ti gyera idiay Gaza idiay Doha, Qatar a panggep iti in-inut a pannakawaya-waya dagiti kautibo ken panangpa-atras kadagiti soldado ti Israeli.
Segun iti Israel, ti pannakatantan ti negosasyon ket gapo iti saan a panangamong ti Hamas nga awaten ti singasing a panawanen ti Gaza, bayat a nga insungbat met ti Hamas a panggep da ti agsubli ti linya nga iggem ti Israel idi napalabas a panagtataripong.
Kabayatanna, maysa a mass shooting met iti aid distribution point idiay Rafah ti naipadamag idi Sabado, kauddian nga insidente a nagresulta ti pannakatay dagiti tattao a nakapila para iti rasyon.
Insayangkat met ti Israel ti kabaroan a sistema da ti panangiwaras ti ayuda idi Mayo, karaman ti Estados Unidos, ken protektado dagiti soldado nga Israelita tapno malapdan dagiti militante a panaggundaway.
Rinibu nga Israelita iti nagtitipon idi kallabes idiay Tel Aviv tapno iwaragawag da ti panawagan a palubosanen dagiti nabatbati a kautibo ken gibusenen ti nadara a gubat.
