LA UNION – Nagkari ni Israeli Prime Minister Benjamin Netanyahu a parmeken ken pukawen na iti militante a grupo kagiddan ti umuna a tawen nga anibersaryo ti Hamas invasion idiay Israel idi Oktubre 7, 2023.
Imbaga ni Netanyahu iti tropa na a magun-od ti Israel iti ballaygi kontra iti militante idiay Gaza strip ken Lebanon ken pinag-sagana na dagitoy para iti iyuswat da nga strike kontra Iran.
Inwaragawag pay ni Netanyahu nga iti uneg ti maysa a tawen, nakapadas da ti nakaru a riribok ket iti napalabas a 12 a bulan, naan-anay a nabaliwan da iti reyalidad.
Inaramid ni Netanyahu iti waragawag kagiddan ti panagbisita na iti Lebanon border.
Kabayatanna, iti biang ti Hamas, inawagan ti grupo iti inyuswat da nga October 7 attack kas “glorious” ken imbaga da a mangar-aramid ti baro a pakasaritaan iti Palestinians iti laban dagitoy.
Maipalagip a ti nasao a kinadamsak a gapwanan dagiti Hamas ket nakatayan ti nasurok 1,200 a tattao idiay Israel a kaadwan ket sibilyan ken dinukot da pay iti dinosena nga indibidwal ken inturong da idiay Gaza.
Kas panang-lagip kadagiti natay iti nakaam-ames a massacre, nangisagut ti kararag, musika ken kandila idiay Tel aviv idi Domingo dagiti naulila a cacabagyan ti aganay 370 a tattao a napapatay iti Nova festival massacre idiay Negev desert.
