Ibilbilang kas dakkel a balligi ti gobierno ti Pilipinas ti pannakaarestar dagiti otoridad ti maysa nga high-profile Japanese fugitive a mapapati a leader ti notorious transnational crime syndicate ditoy Asia.
Naarestar dagiti operatiba manipud Fugitive Search Unit (FSU) ti Bureau of Immigration (BI) ti Japanese national a ni Ryuji Yoshioka, 54-anyos, idi aldaw ti Mierkules, Hunyo 4 idiay Angeles City, Pampanga babaen ti panakikoordianar ti Philippine Navy ken Armed Forces of the Philippines sadiay Northern Luzon.
Naiyuswat ti operasyon babaen ti bileg ti summary deportation order a nai-issue idi pay tawen 2023 maibusor iti suspek.
Ni Yoshioka ket napagammoan a lider ti JP Dragon syndicate, maysa a criminal organization a nakabase idiay Japan a responsable kadagiti panagplano ti nasaknap a panagtakaw ken telecom fraud schemes nga addaan kadagiti operational bases ditoy Southeast Asia.
Karaman pay ti grupo kadagiti adu nga ilegal nga aktibidad ken nakabiktiman ti saan a mabilang nga indibidwal kasta met a nakatakawen ti minilyon a gatad ti kwarta.
Segun kadagiti otoridad, ti presensiya ti pugante a Japanese ditoy Pilipinas ket seryoso a pangta ti kinatalged ti publiko ken ti national security. Maibasar ti record ti BI, simmangpet ti Japanese national ditoy pagilian idi tawen 2022 ken manipud idi ket saanen a pimmanaw.
Iti agdama ket nai-turnover isunan iti warden facility ti Immigration a pakadetenehan na agingga maipa-deport.
